საგამოძიებო კომისიის დასკვნა არის პოლიტიკური დოკუმენტი. იქ არის ბევრი მონაჭორი, რაც “ქართულმა ოცნებამ” გადაწყვიტა, რომ მტკიცებულების სახით შემოგვასაღოს. ვერანაირ სტანდარტს, არამხოლოდ საერთაშორისოს, არამედ ქართულ საკონსტიტუციო მართლმსაჯულებისასაც ეს ვერ უძლებს. ამიტომაც არის გაერთიანებული ყველა პარტიის სარჩელი ერთად , - ამის შესახებ კოალიცია “ძლიერი საქართველო - ლელოს” ერთ-ერთმა ლიდერმა, გიორგი სიორიძემ საკონსტიტუციო სასამართლოში სხდომის დასრულების შემდეგ განაცხადა, სადაც ოპოზიციური პარტიების აკრძალვის შესახებ სარჩელის განხილვა მიმდინარეობდა.
სიორიძის თქმით, კომისიის დასკვნა “ქართულ ოცნებას” თავის ბოროტ პოლიტიკურ ზრახვაში ამხელს.
“თავად საკონსტიტუციო სასამართლო არის დეზორგანიზებული, არ არის კონკრეტულად გაწერილი პროცედურები ასეთი ტიპის პროცესისათვის, რაც მათ, ერთის მხრივ, უტოვებს სივრცეს, რომ თავად დააწესონ რაღაც სტანდარტები, მაგრამ, ამავდროულად, იციან, რა არის დავალება. ეს არის ივანიშვილის დანაშაულებრივი გეგმა, რომ ამ ქვეყანაში გაუქმდეს დემოკრატია, აიკრძალოს, პრაქტიკულად, მთელი ოპოზიცია და დაახლოებით, მილიონი ამომრჩეველი. მეორეს მხრივ, ეს ნიშნავს რუსეთის არგაღიზიანების პოლიტიკის კონსტიტუციურ ვალდებულებად და წესად ქცევას.
ეს ორი მიზანი აქვს ამ სარჩელს, რაც, რა თქმა უნდა, აწუხებს, ალბათ, თითოეულ მოსამართლეს ამ ფარსსა და ისტორიულ დანაშაულში მონაწილეობა. მათ უწევთ მხარეების მოსმენა პროცედურებთან დაკავშირებით. რა თქმა უნდა, არცერთი შუამდგომლობა არ დააკმაყოფილეს. ერთის მხრივ ამბობენ, რომ უნდა ვისაუბროთ სამართლებრივი არგუმენტებით, მაგრამ როდესაც საქმე ეხება პარტიების აკრძალვას, თვითონ პარტიების სამართალი პოლიტიკური სამართალია. როდესაც “ქართული ოცნების” სარჩელი ეყრდნობა პოლიტიკურ განცხადებებს და ამავდროულად სასამართლო ითხოვს, რომ გავმიჯნოთ ჩვენ პოლიტიკური სამართლებრივისგან, თავადვე შედიან სპირალსა და ლაბირინთში, ამ თვალსაზრისით არიან დეზორგანიზებულები და მათი ნებისმიერი უარიც გამოიყურება უსუსურად.
ეს ძალიან მყარ საფუძველს ქმნის “ქართული ოცნების” პოლიტიკური განაჩენისთვის, იმ სისტემის განაჩენისთვის, რომელიც “ქართულმა ოცნებამ” შექმნა და რომელიც აუცილებლად დაინგრევა.
რაც შეეხება საგამოძიებო კომისიის დასკვნას, ეს არის პოლიტიკური დოკუმენტი. იქ არის ბევრი მონაჭორი, რაც “ქართულმა ოცნებამ” გადაწყვიტა, რომ მტკიცებულების სახით შემოგვასაღოს. ვერანაირ სტანდარტს, არამხოლოდ საერთაშორისოს, არამედ ქართული საკონსტიტუციო მართლმსაჯულებისასაც ეს ვერ უძლებს. ამიტომაც არის გაერთიანებული ყველა პარტიის სარჩელი ერთად. ის ამხელს “ქართულ ოცნებას” თავის ბოროტ პოლიტიკურ ზრახვაში”, - განაცხადა სიორიძემ.