„4 ოქტომბრის საქმის“ ერთ-ერთმა მსჯავრდებულმა, პაატა მანჯგალაძემ, სააპელაციო სასამართლოში გამართულ პროცესზე განაცხადა, რომ მის წინააღმდეგ წარდგენილი ბრალდების ერთ-ერთ მთავარ მტკიცებულებად ერთი წლით ადრე გაკეთებული საჯარო განცხადებებია გამოყენებული. მისივე შეფასებით, სასამართლოს განაჩენში 2024 წლის ოქტომბერში გაკეთებული პოლიტიკური განცხადებები არაერთხელ არის მოხსენიებული, თუმცა მათ მის ბრალეულობასთან სამართლებრივი კავშირი არ აქვთ. მანჯგალაძე მიიჩნევს, რომ ეს გარემოება საქმის პოლიტიკურ ინტერესზე მიუთითებს და ხელისუფლების წარმომადგენლებს მოუწოდა, საზოგადოებას განუმარტონ, როგორ შეიძლება მსგავსი განცხადებები პირის დამნაშავედ ცნობის საფუძვლად იქცეს. მან ასევე ჟურნალისტებს სთხოვა, აღნიშნულ საკითხზე კითხვები ირაკლი კობახიძისთვის, მამუკა მდინარაძისა და შალვა პაპუაშვილისთვის დაესვათ. ამავე პროცესზე კიდევ ერთმა მსჯავრდებულმა, პაატა ბურჭულაძემ, განაცხადა, რომ 4 ოქტომბრის აქციის ორგანიზატორი თავად იყო და არა პაატა მანჯგალაძე.