2026 წლის მსოფლიო ჩემპიონატის სტარტი მეხიკოში, „ესტადიო აცტეკაზე“ შედგა. ტურნირის გახსნით მატჩში ერთ-ერთი მასპინძელი, მექსიკა, სამხრეთ აფრიკას შეხვდა და მსოფლიო პირველობა დამაჯერებელი გამარჯვებით დაიწყო — 2:0.
პირველი რეალური საფრთხე მეტოქის კართან მექსიკელებმა შექმნეს. მეხუთე წუთზე რაულ ხიმენესის დარტყმას სამხრეთ აფრიკის მეკარე რონუენ უილიამსი გაუმკლავდა. თუმცა „ბაფანა ბაფანამ“ ანგარიში დიდხანს ვერ შეინარჩუნა. მატჩის მე-9 წუთზე ერიკ ლირას გადაცემის შემდეგ ხულიან კინიონესმა მსოფლიო ჩემპიონატის პირველი გოლი გაიტანა და მასპინძლები დააწინაურა.
კინიონესი ისტორიაში შევიდა, როგორც ჩრდილოეთ და ცენტრალური ამერიკის ზონის პირველი წარმომადგენელი, რომელმაც მუნდიალის გახსნით მატჩში გაიტანა. ამასთან, მისი გოლი გახსნით შეხვედრებში ერთ-ერთი ყველაზე სწრაფია — 2006 წელს ფილიპ ლამის მიერ კოსტა-რიკის კარში მე-6 წუთზე გატანილი ბურთის შემდეგ.
პირველ ტაიმში სამხრეთ აფრიკა შეტევაში ნაკლებად აქტიური იყო და მეტოქის კარის მიმართულებით მხოლოდ ორჯერ დაარტყა. შესვენების შემდეგ მათი მდგომარეობა კიდევ უფრო გართულდა — 49-ე წუთზე იაია სითჰოლემ ბოლო იმედის ჯარიმისთვის წითელი ბარათი მიიღო და გუნდი ათი კაცით დარჩა.
რიცხობრივი უპირატესობა მექსიკამ 67-ე წუთზე გამოიყენა. რობერტო ალვარადოს ჩაწოდებას რაულ ხიმენესი თავური დარტყმით გამოეხმაურა და ანგარიში 2:0 გახადა. ეს მსოფლიო ჩემპიონატებზე მისი პირველი გოლი აღმოჩნდა.
84-ე წუთზე სამხრეთ აფრიკამ კიდევ ერთი ფეხბურთელი დაკარგა. მოედანზე ახლად შესულმა თემბა ზვანემ მეტოქეს სახეში დაარტყა, ეპიზოდის VAR-ზე გადამოწმების შემდეგ კი მსაჯმა მას პირდაპირ წითელი ბარათი უჩვენა.
დამატებულ დროში მესამე გაძევებაც დაფიქსირდა. სესარ მონტესმა სამხრეთ აფრიკის სწრაფი კონტრშეტევა წესების დარღვევით შეაჩერა და მოედანი ნაადრევად დატოვა. დარჩენილ წუთებში ანგარიში აღარ შეცვლილა — მექსიკამ მსოფლიო ჩემპიონატი გამარჯვებით დაიწყო.
მეორე ტურში მექსიკა სამხრეთ კორეას შეხვდება, ხოლო სამხრეთ აფრიკა ჩეხეთის ნაკრებს დაუპირისპირდება.