როგორ გამოიყურება 10 უმსხვილესი ეკონომიკა მსოფლიოში და როგორია მათ ფონზე საქართველოს მოკრძალებული მაჩვენებელი. საერთაშორისო სავალუტო ფონდის ბოლო, 2025 წლის მონაცემებით, მსოფლიოში ყველაზე დიდი ეკონომიკა ამერიკის შეერთებულ შტატებს აქვს და მისი მშპ 30 ტრილიონ დოლარზე მეტს შეადგენს. აღსანიშნავია ისიც, რომ მსოფლიოს პირველ და მეორე უმსხვილეს ეკონომიკებს შორის სხვაობა 10.8 ტრილიონ დოლარს აჭარბებს. კერძოდ, მეორე ყველაზე დიდი ეკონომიკა ჩინეთს აქვს და 19.5 ტრილიონ დოლარს უტოლდება. მსოფლიოში უმსხვილესი ეკონომიკების ათეულში მესამე ადგილი 4.92 ტრილიონი დოლარის მოცულობით გერმანიას ერგო, მეოთხე ადგილზე კი იაპონიაა, რომლის ეკონომიკის მოცულობა 4.39 ტრილიონ დოლარს შეადგენს. რეიტინგში ხუთეულს ხურავს ინდოეთი, რომლის ეკონომიკაც 4.26 ტრილიონი დოლარის ღირებულებისაა. უმსხვილესი ეკონომიკების ათეულში არიან ასევე გაერთიანებული სამეფო, საფრანგეთი, იტალია, კანადა და ბრაზილია. სავალუტო ფონდის მონაცემების მიხედვით, რეიტინგში რუსეთი მე-11 ადგილზეა, მისი ეკონომიკის მოცულობა 2.2 ტრილიონ დოლარს შეადგენს. მეზობელ ქვეყნებს შორის რუსეთის შემდეგ ყველაზე დიდი ეკონომიკა თურქეთს აქვს და 1.46 ტრილიონს უტოლდება. საქართველოს სამეზობლოში ყველაზე ღარიბი ქვეყანა სომხეთია, მისი ეკონომიკის მოცულობა 26.5 მილიარდ დოლარს აჭარბებს, მას მოსდევს საქართველო 35.9 მილიარდი დოლარით და აზერბაიჯანი 77 მილიარდი დოლარით.