რუსეთის საოკუპაციო ძალებსა და უკრაინის დამცველებს შორის, გასული დღის განმავლობაში, ფრონტზე 40-ზე მეტი საბრძოლო შეტაკება მოხდა, უკრაინის დამცველებმა მოწინააღმდეგის ცოცხალი ძალის თავმოყრის 10 რაიონს დაარტყეს. გენერალური შტაბის ანგარიშის მიხედვით, უკრაინის თავდაცვის ძალების ავიაციამ 7 დარტყმა მიაყენა მოწინააღმდეგის პირადი შემადგენლობის თავმოყრის რაიონებს, 3 კი - მათ საზენიტო სარაკეტო სისტემებს. ამასთან, უკრაინის სარაკეტო და საარტილერიო ქვედანაყოფებმა, გასული დღე ღამის განმავლობაში, მტრის კუთვნილი 5 საზენიტო-სარაკეტო სისტემა, მრავალჯერადი სარაკეტო სისტემა, საცეცხლე პოზიციაზე განთავსებული საარტილერიო საშუალებები, საბრძოლო მასალის საცავი და მტრის ცოცხალი ძალის თავმოყრის 5 რაიონი გაანადგურეს.