ნებისმიერი უცხოელი ჯარისკაცი, რომელიც სექტემბრის შემდეგ ავღანეთში დარჩება, რისკის ქვეშ იქნება, როგორც ოკუპანტი - ამის შესახებ „თალიბანის“ პრესსპიკერმა სუჰაილ შაჰინმა BBC-ს განუცხადა.
„თალიბანმა“ ეს განცხადება გავრცელებული ინფორმაციის საპასუხოდ გააკეთა, რომლის თანახმადაც, შესაძლოა ავღანეთში დიპლომატიური მისიებისა და ქაბულის საერთაშორისო აეროპორტის დასაცავად 1 000-მდე სამხედრო, ძირითადად ამერიკელები, დარჩეს.
„თუ ისინი თავიანთ ძალებს დოჰას შეთანხმების დარღვევით დატოვებენ, ამ შემთხვევაში ჩვენი ხელმძღვანელობა გადაწყვეტს, თუ როგორ ვიმოქმედოთ”, - განუცხადა შაჰინმა BBC-ს.
მისი მტკიცებით, დიპლომატები, არასამთავრობო ორგანიზაციები და სხვა უცხოელი სამოქალაქო პირები თალიბების სამიზნე არ იქნებიან.
"ჩვენ წინააღმდეგი ვართ უცხო ქვეყნების სამხედრო ძალების და არა დიპლომატების, არასამთავრობო ორგანიზაციების წარმომადგენლებისა და საელჩოების ფუნქციონირების - ეს ჩვენს ხალხს სჭირდება. ჩვენ მათ საფრთხეს არ შევუქმნით", - აღნიშნა თალიბების პრესსპიკერმა.
შეგახსენებთ, აშშ-ის პრეზიდენტმა ჯო ბაიდენმა განაცხადა, რომ აშშ-ის ჯარი ავღანეთს 2021 წლის 11 სექტემბრამდე, 9/11 ტერაქტის 20 წლისთავამდე, დატოვებს.