საქართველო ვერ იქნება ჩართული იმ სამშვიდობო პლატფორმაში, სადაც საქართველოს ტერიტორიების ოკუპანტი ქვეყანა მონაწილეობს, – ამის შესახებ საქართველოს საგარეო საქმეთა მინისტრის მოადგილემ ალექსანდრე ხვთისიაშვილმა რუსეთის საგარეო უწყების ხელმძღვანელის მიერ გაკეთებულ განცხადებასთან დაკავშირებით განაცხადა.
ამით მინისტრის მოადგილე გამოეხმაურა რუსულ მედიაში გავრცელებულ სერგეი ლავროვის განცხადებას, რომლის მიხედვითაც, „რუსეთი მიესალმება ირანის, თურქეთის, საქართველოსა და ევროპის რამდენიმე ქვეყნის მისწრაფებას, მონაწილეობა მიიღონ მთიანი ყარაბაღის ეკონომიკის აღდგენაში. უკვე ისმის ინიციატივები, რომ აზერბაიჯანი, სომხეთი და საქართველო, რუსეთის, ირანისა და თურქეთის მონაწილეობით, ახალი რეალობის გათვალისწინებით, რეგიონში ურთიერთობის დამყარებას ცდილობენ“.
როგორც საქართველოს საგარეო საქმეთა მინისტრის მოადგილემ აღნიშნა, ვიდრე არ იქნება გადადგმული დეოკუპაციის კუთხით შესაბამისი ნაბიჯები, მსგავსი ინიციატივა ვერ იქნება პერსპექტიული.
