ყველაზე სახიფათო ორგანიზმში მიმდინარე ის ფარული პროცესებია, რომელთა შესახებაც სხეული დუმს. შესაძლოა, ეს სიჩუმე მთელი სიცოცხლეც არ დაირღვეს, მაგრამ ისიც შესაძლებელია, უეცრად განგაშის ზარებმა ჩამორეკოს.
გვინდა სწორედ ასეთ დაავადებას მივაპყროთ თქვენი ყურადღება.
თავის ტვინის სისხლძარღვთა ანევრიზმას მაღალი სიკვდილიანობა ახასიათებს, ამიტომ უნდა ვიცოდეთ, რას მივაქციოთ ყურადღება რისკის შესამცირებლად, დროული დიაგნოსტიკისთვის და გართულებების თავიდან ასაცილებლად.
ანევრიზმა - ეს სიტყვა ბერძნული წარმოშობისაა და ქართულად “გაფართოებას” ნიშნავს. ასეთი გაფართოება შეიძლება შეგვხვდეს როგორც არტერიებში, ისე გულის კუნთშიც. ამჯერად საქმე თავის ტვინის მკვებავ არტერიებს ეხება – ვისაუბრებთ პროცესზე, რომელიც თავის ტვინის სისხლის მიმოქცევის სისტემაში მიმდინარეობს.