დონალდ ტრამპმა აშშ-ის პრეზიდენტობის ბოლო საათებში ყოფილი მრჩეველი სტივ ბენონი შეიწყალა, - ინფორმაციას ამის შესახებ CNN-ი ავრცელებს.
ბენონს ბრალი მექსიკის საზღვარზე კედლის ასაშენებლად თანხების მოზიდვის ონლაინ კამპანიასთან - „ჩვენ ვაშენებთ კედელს“ - დაკავშირებული თაღლითობის გამო აქვს წარდგენილი, თუმცა ის ბრალს არ აღიარებს.
CNN-ის ინფორმაციით, შეწყალებულ პირებს შორის არიან რეპერები ლილ უეინი და კოდაკ ბლექი, რომლებმაც იარაღის შეძენა-შენახვასთან დაკავშირებით წარდგენილი ბრალი აღიარეს.
შეწყალებულთა შორის ასევე მოხვდნენ დეტროიტის ყოფილი მერი კვამე კილპატრიკი და Google-ის ყოფილი ინჟინერი ენტონი ლევანდოვსკი.
დონალდ ტრამპმა, პრეზიდენტობის ბოლო საათებში, საერთო ჯამში, 73 ადამიანი შეიწყალა და სასჯელი კი 70-ს შეუმსუბუქა.