4 ოქტომბრის საქმეზე დაკავებულებს: პაატა ბურჭულაძეს, მურთაზ ზოდელავას, ირაკლი ნადირაძეს, პაატა მანჯგალაძესა და ლაშა ბერიძეს ციხიდან სატელეფონო ზარები, პაემნები და წერილები აეკრძალათ. ინფორმაციას ადვოკატები ადასტურებენ.
როგორც ბურჭულაძის უფლებადამცველმა შოთა თუთბერიძემ განაცხადა, დადგენილება წერილობითი ფორმით არ ჩაუბარებიათ. მისივე თქმით, დადგენილების მიღებისთანავე, საკითხს გაასაჩივრებენ. საორგანიზაციო კომიტეტის წევრებს, აღკვეთი ღონისძიების სახით პატიმრობა აქვთ შეფარდებული. სახელმწიფო ბრალდება მათ კონსტიტუციური წყობის ძალადობრივად შეცვლისკენ ან სახელმწიფო ხელისუფლების დამხობისკენ მოწოდებას, ასევე ჯგუფური ძალადობის ორგანიზებას, ხელმძღვანელობასა და მასში მონაწილეობას ედავება.