პორტუგალიაში ტყის ხანძარს ამ დრომდე ებრძვიან. სტიქიის შედეგად შვიდი ადამიანი დაიღუპა, მათ შორის ოთხი მეხანძრე. ამასთან, დაშავდა 40-ზე მეტი ადამიანი, რომელთაგან ორის მდგომარეობა მძიმეა. ხანძარი კვირას გაჩნდა. ამ დროისთვის დამწვარია 62 000 ჰექტარის ფართობის ტერიტორია. პორტუგალიის ყველა მუნიციპალიტეტში, რომელიც ბოლო დღეებში ხანძრების გამო დაზარალდა, საგანგებო მდგომარეობაა გამოცხადებული. ხანძრის ლოკალიზებას ამ დროისთვის 1 000-ზე მეტი მეხანძრე 320-ი სპეცტექნიკის გამოყენებით ცდილობს. დაზიანებულია 40-ზე მეტი სახლი. პორტუგალიის მთავრობის მოთხოვნის საპასუხოდ, ხანძართან საბრძოლველად ევროკომისიამ რვა სპეციალური თვითმფრინავი გაგზავნა.