საქართველოს პრემიერ-მინისტრი ირაკლი კობახიძე, პარიზში, ოლიმპიური თამაშების მონაწილე სახელმწიფოებისა და მთავრობის მეთაურებთან ერთად დაესწრო სამიტს „სპორტი მდგრადი განვითარებისთვის". მთავრობის ადმინისტრაციის ცნობით, ღონისძიებამ 500-მდე მონაწილეს უმასპინძლა, რომელთა შორის, სახელმწიფოთა და მთავრობის მეთაურებთან ერთად, საერთაშორისო ორგანიზაციებისა და სპორტული ფედერაციების წარმომადგენლები იყვნენ. საქართველოს მთავრობის მეთაური ასევე დაესწრო საზეიმო მიღებას, რომელიც პარიზის ოლიმპიადის გახსნის ცერემონიის სტუმარი სახელმწიფო ლიდერების პატივსაცემად, ლუვრში გაიმართა.