ბრიუსელის ოფიციალური პირების განცხადებით, ევროკავშირს უკრაინისა და მოლდოვის ევროკავშირში გაწევრიანების შესახებ ოფიციალური მოლაპარაკებების დაწყება ივნისში სურს, - ინფორმაციას Politico ავრცელებს. გამოცემის თანახმად, ხუთი დიპლომატი მათ ანონიმურობის პირობით ესაუბრა და განუცხადა, რომ ბლოკის მიზანია, უკრაინისა და მოლდოვას გაწევრიანების ოფიციალური მოლაპარაკებები 25 ივნისს დაიწყოს, როდესაც ევროპული საბჭოს სამიტია დაგეგმილი. გამოცემის თანამოსაუბრეები დარწმუნებულნი არიან, რომ ეს მორალურად გააძლიერებს უკრაინას, რომელიც რუსეთის აგრესიის წინააღმდეგ უკვე მესამე წელია იბრძვის. Politico-ს წყაროების ცნობით, მიმდინარეობს ინტენსიური მუშაობა, რათა დაარწმუნონ უნგრეთის მთავრობა, დაეთანხმოს უკრაინის ევროკავშირში გაწევრიანების შესახებ მოლაპარაკებების დაწყებას.