რაგბის მსოფლიო თასის დასრულების შემდეგ საფრანგეთში სარაგბო ჩემპიონატი განახლდა, რომლის ფარგლებშიც ქართველმა მორაგბეებმა თავი გამოიჩინეს.
„ლიონი“ საკუთარ მოედანზე „კლერმონს“ შეხვდა და ანგარიშით 41:22 დაამარცხა, რაშიც დიდი წვლილი საქართველოს ნაკრების ლიდერს, დავით ნინიაშვილს მიუძღვის, რომელმაც მე-20 და 76-ე წუთებზე ორი ლელოს დადება მოახერხა.
ნინიაშვილთან ერთად „ლიონის“ ძირითადში ითამაშა საქართველოს ნაკრების კიდევ ერთმა მორაგბემ, ბექა საღინაძემ.
ამ ტურში კიდევ ერთმა ქართველმა გამოიჩინა თავი. „მონპელიე“ საკუთარ მოედანზე „რასინგთან“ 16:19 დამარცხდა, მასპინძელთაგან ერთადერთი ლელო ვანო კარკაძემ მატჩის ბოლოს დადო, თუმცა „მონპელიემ“ თამაშის გადარჩენა ვეღარ მოახერხა.