საქართველოს საკალათბურთო ნაკრები მსოფლიო ჩემპიონატზე ითამაშებს. შესარჩევი ეტაპის გადამწყვეტი შეხვედრა თბილისში ისლანდიის გამარჯვებით, ანგარიშით 80:77 დასრულდა. მიუხედავად იმისა, რომ ნაკრები მატჩში დამარცხდა, შესარჩევი ეტაპის გათამაშების ცხრილის თანახმად, დასკვნით თამაშში საქართველოს ნაკრებს სამი ქულით წაგებაც ჰყოფნიდა, რაც იმას ნიშნავს, რომ საქართველომ ისტორიაში პირველად მსოფლიო ჩემპიონატის საგზური მოიპოვა. შეხვედრის დასრულების შემდეგ ქართველი ქომაგები საქართველოს ნაკრების ავტობუსს თავისუფლების მოედნამდე გაყვნენ და გამარჯვება ერთად იზეიმეს. მსოფლიოს 2023 წლის ჩემპიონატი 25 აგვისტოდან 10 სექტემბრის ჩათვლით აზიის სამ ქვეყანაში – ფილიპინებში, იაპონიასა და ინდონეზიაში ჩატარდება.