2022 წლის იანვარ-თებერვალში საქართველოდან განხორციელებული საქონლის ექსპორტის მოცულობამ (არადეკლარირებული ექსპორტის გარეშე) 760.4 მლნ აშშ დოლარი შეადგინა, რაც 54.5 პროცენტით მეტია გასული წლის შესაბამისი პერიოდის მაჩვენებელზე.
სტატისტიკის ეროვნული სამსახურის წინასწარი მონაცემებით, ადგილობრივი ექსპორტი (ექსპორტი რეექსპორტის გარეშე), მთლიანი ექსპორტის 73.1 პროცენტს შეადგენს. აღნიშნული მაჩვენებელი წინა წლის შესაბამის პერიოდთან შედარებით 51.7 პროცენტით გაიზარდა და 555.8 მლნ აშშ დოლარს გაუტოლდა.
საანგარიშო პერიოდში უმსხვილესი საექსპორტო პარტნიორებია: ჩინეთი (90.0 მლნ აშშ დოლარი), ბულგარეთი (83.7 მლნ აშშ დოლარი) და რუსეთი (80.2 მლნ აშშ დოლარი).
საქსტატის ცნობით, 2022 წლის იანვარ-თებერვალში ადგილობრივი ექსპორტის ათეულში პირველ ადგილზე სპილენძის მადნები და კონცენტრატები არის წარმოდგენილი 156.3 მლნ აშშ დოლარით, აღნიშნული სასაქონლო ჯგუფის წილი მთლიანი ადგილობრივი ექსპორტის 28.1 პროცენტს შეადგენს. მეორე ადგილზეა ფეროშენადნობები 100.5 მლნ აშშ დოლარით, ხოლო მესამე ადგილს იკავებს აზოტოვანი სასუქები 58.2 მლნ აშშ დოლარით. ხუთეულში შედის - ყურძნის ნატურალური ღვინოები და მინერალური და მტკნარი წყლები.